Nagdangat na sa walo ang narecord nga kaso sang mga nalukpan sang palupok sa Negros Island Region.
Sa interview sang Bombo Radyo Bacolod kay Department of Health – Negros Island Region (DOH-NIR) Assistant Regional Director Adrian Hort Ramos, kahapon kadungan sa besperas sang Paskwa, nakarecord sang apat ka mga kaso sang biktima sang palupok.
Sa kabug-usan anom ang mga kaso sa Negros Occidental, isa sa Negros Oriental kag isa sa Bacolod City.
Sa karun wala pa sang reported nga kaso sa Siquijor.
Suno kay Ramos, kalabanan sa mga biktima ang kabataanan.
Laban naman sa mga nalukpan ang bangod sa boga, samtang may ara man sang biktima sang triangle, rocket kag pwitis.
Ginapakamaayo sini nga tanan nga kaso ang gilayon nga nasolusyonan kag wala sang critical cases.
Suno kay Ramos ang tanan nga health sector ang napaidalom na sa Code White Alert, gani ginapasalig sini nga nakahanda ang mga health facilities sa pagcater sang kaangay nga mga insidente.
Panugyan naman sini sa mga malukpan sang palupok nga gilayon nga hugasan ang pilas kag dal-on sa pinakamalapit nga health facility.
Suno diri, madamo sang aktibidad nga mahimo nga indi magakinahanglan ang paggamit sang palupok kaangay sa paglantaw sang community fireworks display, paggamit sang torotot kag mga pahampang.
