Liwat nga ginpahanumdom sang tagpamaba sang Negros Occidental Police Provincial Office sa mga ginikanan nga imonitor gid ang mga kabataan nga indi makagamit sang ginadumilian nga palupok.
Sa interview sang Bombo Radyo Bacolod kay Police Captain Judesses Catalogo, wala pa sila sang naconfiscate nga nagagamit kag nagahimo sang illegal nga boga.
Paathag sini nga lakip sa gintumod sang Department of Health nga “illegal firecracker device” ang boga, bangod ini ang improvised kag masami ginagamitan sang mga lata ukon PVC Pipe nga mahimo mag-malfunction kag maglupok nga makatuga sang kahalitan.
Apang aminado si Catalogo nga madamo sa gihapon sang mga menor de edad nga nagagamit sang boga.
Suno diri, responsibilidad sang mga ginikanan nga mabantayan ang ila mga kabataan, kag dapat man nga ma-educate ang mga ini sa konsekwensya sang paggamit sang palupok.
Sa karun, wala pa nila na consolidate ang kabug-usan nga firecraker related incident sa probinsya.
Apang suno diri, kalabanan sa mga biktima ang minors, kaangay sa pinakauna nga biktima sang palupok gikan sa La Carlota City, kag ang ulihi nga narecord sa Bago City.
Suno kay Catalogo, ginpamulot sang bata ang mga wala naglupok nga palupok kag ginsindihan, nga nagresulta sa iya pagkapaso.
