Nasapwan ang isa ka bangkay sang babayi sa kilid sang flyover sa Purok Mars, Barangay Singcang-Airport, Bacolod City, kaina sang udto, December 28, 2025.
Sa interview sang Bombo Radyo Bacolod kay Police Captain Greeky Cayao, station commander sang Bacolod Police Station 8, pasado ala1:00 ang takna kaina sang hapon may nagtawag sa ila nga concerned citizen nga may nasapwan nga bangkay.
Suno kay Cayao, ang bangkay ang nagasuksok sang dark brown kag block skinny jeans.
Suno sa station commander indi pa matumod ang edad sang bangkay bangud nagakaagnas na ini apang una na nga ginpahayag sang imbestigador sang Bacolod City Police Station 8 nga yara ini sa kapin 40.
Sa karun padayon pa ang imbestigasyon sang mga kapulisan agud matumod ang identity sang biktima kag ang rason sang kamatayon sini.
