Naghina ang baligya-anay sang lechon sa karun nga tuig bangod sa pagbaha nga tuga sang pila ka bagyo nga naglabay kun sa diin pila ka mga baboy ang naanod kag napatay.
Sa interview sang Bombo Radyo kay Raney “Panoy” Salgado, lechon master sang Donols Lechon sa Brgy 36, Bacolod City, mabudlay sa ila ang magpangita sang baboy bangod sa naglabay nga bagyo.
Suno diri, sang nagluntad ang baha sang tinalikdan, madamo sang baboy nila ang naanod.
Suno kay Salgado, nagapadulong pa sila sa bukid para magbakal sang lechon bangod kalabanan sa mga baboy sa ciudad ang fattening nga ginakarne.
Bangod nga mahal ang baklanay, nagmahal man ang baligya-anay nga yara sa karun sa P1,000 per kilo kag ang gamay nga bilog nga lehon nagabalor sang P8,500 samtang ang dako naman nagabalor sang P11,000.
Pahayag ni Salgado man sini nga indi mahapos maglechon sang baboy apang sa 20 ka tuig sini nga trabaho, naanad na siya sa trabaho kag sa init sa pagtiyog sang lechon.
