Ginapreparar na sang Office of the Ombudsman ang pagpatigayon sang isa ka madalom nga pag-usisa nahanungod sa mga na-turn over nga computer kag mga dokyumento ni late Department of Public Works and Highways Undersecretary Maria Catalina Cabral.
Suno kay Assistant Ombudsman Atty. Mico Clavano, ipaidalom sa “digital forensic examination” ang Central Processing Unit (CPU) nga gin-gamit sang anay opisyal.
Sang nakaligad lang nga semana, gilayon nga gin-turn over sang DPWH sa Office of the Ombudsman ang mga dokumento kag computer nga ginagamit sang anay opisyal.
Ini kasunod sang pag-isyu sang subpoena duces tecum sang opisina nga nagamando nga iproduce ang amo nga mga pagkabutang.
Gani ginpahayag ni Clavano nga sila ang nagapreparar na para sa patigayonon nga digital forensic examination.
Suno diri, siguruhon sang Office of the Ombudsman nga mangin bukas ukon transparent ang pagahimuon nga pag-usisa.
Mangin kaupod man nila sa proseso ang Commission on Audit (COA), DPWH kag Philippine National Police (PNP) Anti-Cybercrime Group.
Gindugang pa niya nga ila na ginsigurado nga naka-silyo ang naturn over nga CPU.
Nagapati ang Ombudsman nga ang pinakamasaligan nga ginhalinan sang ebidensya amo ang naghalin mismo sa ahensya sang gobyerno kag sa mga indibidwal nga nagakapot sini.
Suno diri, mas maayu ang mga direkta nga source sangsa mga kopya lamang.
