Ginreport sang Police Regional Office–Negros Island Region (PRO-NIR) nga matawhay, malinong, kag secure ang pagselebrar sang holiday season bangud sa madinalag-on nga pag-implementar sang “Ligtas Paskuhan 2025” nga ginsuguran sang Disyembre 16, 2025 tubtob Enero 1, 2026.
Sa interview sang Bombo Radyo Bacolod kay Police Lt Col Joem Malong, spokesperson sang Police Regional Office – Negros Island Region, nagdangat sa 1,914 ka kapulisan ang gindeploy bilog nga rehiyon, kaupod ang local government enforces kag iban pa nga ahensya, agud masiguro ang public safety sa nagakalain-lain nga lugar.
Kalakip sa mga ginbantayan ang mga transportation hubs, tourist destinations, mga simbahan kag iban pa nga major convergence areas.
May-ara naman sang 36 ka mga LGU designated firecracker zones, nga nagabulig sa pagpahagan-hagan sang numero sang biktima sang palupok.
Ang mga lugar ang ginabantayan man sang mga kapulisan.
Suno kay Malong, wala sila sang narecord nga napatay kag nasamaran bangod sa paggamit sang palupok sa pagsugata sang Bag-ong tuig.
Kaina sang aga, nagpatigayon man ang PRO-NIR sang presentation sang mga nakumpiskar ng palupok kag boga nga nagdangat sa 23,415 items.
Sa pihak nga bahin sa bilog nga coverage preriod sang Oplan Ligtas Paskuhan 2025, sila ang nakarecord sang 58 ka road accidents samtang wala naman sang natabo nga dalagkuan nga krimen, kag wala man sang stray bullet incidents.
Sa ila anti-criminality efforts may ara sang naaresto nga 91 ka mga drug personalities, 101 nga wanted persons kag 34 nga nadakpan sa illegal nga sugal.
