100 percent ang ginsaka sang nakumpiskar nga palupok kag boga sang Bacolod City Police Office subong nga New Year kun ipaanggid sang pagtakop sang 2024.
Sa interview sang Bombo Radyo Bacolod kay BCPO Spokesperson Police Captain Andro Maapni, nangin generally peaceful ang selebrasyon sang Paskwa kag New Year sa Bacolod City.
Ang mga nakumpiskar halin lamang Disyembre 28 tubtob 31 ang nagdangat sa balor P66,000, nga doble ang pagsaka sa mga nakumpiskar sa pagtakop sang 2024 nga nagabalor P33,000.
Paathag ni Maapni nga ang mga ginkumpiskar ang wala nagakahulugan nga mga illegal nga palupok, bangod madamo diri ang ginkumpiskar bangod sa illegal nga pagbaligya.
Pahanumdom sini nga may-ara lamang sang designated firecracker/fireworks selling area sa likod sang Pope John Paul II tower.
Gani ang nagabaligya nga gwa na sa lugar, ang ginakonsiderar nga illegal.
Sa ila nga record, tatlo lamang ang firecracker-related incident sa pagtakop sang 2025, nga dako ang deperensya sa narecord sang magtakop ang 2024, nga nagdangat sa 22 ka kaso.
Samtang ang mga kaso sang lunsay mga minor injuries lamang kag mga outpatients, nga nagapakita nga nangin epektibo ang panawagan batok sa illegal nga palupok, nga ginsunod man sang kadam-an nga Bacolodnon.
