“60 Years of Media Excellence,” ginasaulog sang Bombo Radyo Philippines paagi sa Top Level Management Conference

Ginasaulog sang Bombo Radyo Philippines ang anum ka dekada nga media excellence paagi sa Top Level Management Conference humalin subong nga Enero 5 tubtob sa Enero 11, 2026, nga may tema nga “Bombo Radyo Philippines: Celebrating 60 Years of Media Excellence.”

Ginpangunahan nanday Chairman Dr. Rogelio M. Florete, President kag Chief Executive Officer Margaret Ruth C. Florete ang aktibidad, kun sa diin magatambong sa conference sa Iloilo City, ang mga station managers kag mga senior officers gikan sa 25 key areas sang Bombo Radyo Philippines.

Ang isa ka semana nga pagtililipon ang nakasentro sa strategic planning kag direction-setting bilang preparasyon sang network sa mga masunod pa nga tinuig.

Pagadiskusyonan man ang mga topiko sang innovations, serbisyo publiko kag padayon nga promisa sa credible, responsible, kag public service-oriented broadcasting.

Bilang kabahin sang ika-60 anibersaryo, ibida sang Bombo Radyo Philippines ang malaba nga listahan sang mga prestihiyoso nga pasidungog sa patag sang news reporting, public affairs programming, kag public service broadcasting.

Kalakip diri ang Bombo Network News, nga back-to-back winner sang Catholic Mass Media Awards (CMMA) bilang Best News Program para sa 2024 kag 2025, kag ang Star FM, nga ginkilala bilang Best Entertainment Program sa sulod sang tatlo ka magkasunod nga tuig (2023–2025).

Samtang, ang Bombo Radyo Iloilo, flagship station sang network, ang ginkilala nga Best AM Station (Provincial) kag Best News Program (Provincial) sa 28th Golden Dove Awards (2025) sang Kapisanan ng mga Brodkaster sa Pilipinas (KBP).

Magluwas sa mga pasidungog, ginpabakod pa sang mga independent survey ang kredibilidad kag pagsalig sang mga publiko sa Bombo Radyo.

Naggwa ini bilang Most Trusted News and Information Source sa Radio category sa National Survey on Media and Information Literacy sang Philippine Information Agency sang Nobyembre 2024.

Ginkilala man sang OCTA Research (Disyembre 2024) bilang nagapanguna nga radio source sang balita kag impormasyon sang mga Pilipino nga adult kag padayon nga nagapanguna sa quarterly Pahayag Survey sang Publicus Asia, Inc. sa kategorya nga Most Trusted Media Outlets in the Radio.

Ang tanan nga pagkilala ang pamatuod sang dedikasyon sang Bombo Radyo Philippines sa pagpabilin sang pinakamataas nga standard sang broadcast journalism.

Ginpabakod man sang conference ang pamana sang Bombo Radyo bilang nagapanguna nga radio network sa pungsod, nga may 32 ka digitalized AM kag FM stations sa bug-os Pilipinas nga nagaserbe nga pagpasalamat sa publiko.

Bangud sa inyo, padayon nga ginatindugan sang Bombo Radyo ang maayo nga pagbalita kag sa indi matupungan nga papel sa pagdul-ong sang balita kag public service.