May yara na sang ginpreparar nga penalidad para sa IPM Construction and Development Corporation bangod sa mga basura nga wala nahakot kag wala pagmintinar sa sanitary landfill.
Sa interview sang Bombo Radyo Bacolod kay Councilor Homer Bais, chairman sang Committee on Ecology and Natural Resources sa Sangguniang Panlungsod, gina-una sa karun nga makolekta ang basura sa tatlo ka dalagko nga merkado sa ciudad kag sa pila ka merkado sa mga barangay.
Suno diri, madamo pa gid sang wala nahakot bangod nagabukid ang mga basura nga ginbilin sang IPM.
Bangod nga may bag-o na nga garbage hauler ang ciudad, apang wala sang mahimo ang International Solid Waste Integrated Management Specialists, Inc. (ISWIM) kundi hakoton gid ang mga basura.
Dugang pa ni Bais, wala man na minitinar sang IPM ang landfill kun sa diin may pila pa ka trucks nga nagalinya nga wala naula ang basura.
Pasalig sang konsehal nga maabot gid ang adlaw nga mabalik sa normal ang pagkolekta sang basura sa ciudad.
