Imbes nga magpaidalom sa gall bladder surgery, ginpaidalom sa vasectomy ang isa ka 40 anyos nga lalaki sa Argentina.
Nakibot gid ang lalaki sang nahibaluan niya nga lain ang surgery nga ginhimo sa iya.
Ang lalaki ang ginkilala kay Jorge Baseto nga nagpaschedule para sa gall bladder surgery pero sa wala mahibaluan nga rason, ang operasyon ang gin postpone.
Sa adlaw sang operasyon, ang staff sang ospital ang nagsulod sa kwarto sang pasyente, ginpahigda si Baseto sa stretcher, wala na ginpamangkot pa ukon gintsekyar ang iya nga chart kag gilayon gindala sa operating room.
Sang nagbugtaw na si Baseto gikan sa operasyon, wala ini sang ihibalo sa natabo sa iya, apang nagsulod ang doktor kag ginpalab-ot ang balita nga madinalag-on ang vasectomy operation.
Wala na nakareact pa si Baseto, bangud siya ang gilayon nga ginpaidalom sa nagakadapat nga gall bladder surgery.
Matapos ang iya ikaduha nga surgery, luyag kuntani ni Baseto mahibaluan kun ngaa nagsala ang operasyon kag kun sarang pa ini mabaliskad.
Nagabinasulay naman ang mga doktor bangod sa dako nga sala kag ginahambalan na lamang nila ang lalaki nga indi magkabalaka bangud pwede pa ini gihapon makabata pinaagi sa artificial insemination.
Suno sa abogado ni Baseto, masami nga ginaperform ang vasectomy kada Miyerkules, gani nagkumpyansa ang mga doktor nga si Baseto ang isa ka vasectomy patient.
Ginpasakaan na ni Baseto sang kaso ang mga doktor kag hospital.
