Nangin Tropical Depression na ang Low Pressure Area nga ginamonitor sa sulod sang Philippine Area of Responsibility kag ginhingadlan bilang ADA.
Sa interview sang Bombo Radyo kay Dave Cuajao, weather forecaster sang Negros Occidental Provincial Disaster Management Program Division (PDMPD), ang Tropical Depression Ada nasiplatan sa 635 km east sang Hinatuan, Surigao del Sur.
Dala sini ang kabaskugon sang hangin nga nagadangat sa 45 km/h kag pagmadlos nga tubtob sa 55 km/h.
Ini ang nagahulag padulong sa naaminhan-nakatungdan nga dereksyon sa kadasigon nga 35 km/h.
Suno kay Cuajao, yara na sa Tropical Cyclone Wind Signal No. 1 ang Northern Samar, Samar, kag Eastern Samar kag Dinagat Islands, Surigao del Norte, kag Surigao del Sur.
Mahimo mabatyagan ang impact sang Tropical Depression Ada sa probinsya sa adlaw sang Biyernes kag Sabado, amo nga lauman ang maulanon kag mabagyohon nga panahon.
Samtang, nakadepende naman sa weather disturbance kun may tsansa nga maglain ang dereksyon sang bagyo apang sa karun kalabanan nga maapektohan sini amo ang Luzon area kun indi ini matunaw.
Pahayag ni Cuajao, para sa tuig 2026 may kapin 25 ka bagyo nga malabay sa pungsod kag sa karun nga bulan sang Enero, duha ukon tatlo ka bagyo ang lauman.
Ang Tropical Depression Ada, ang pinakauna nga bagyo subong nga tuig 2026.
