Nagapanawagan ang City Administrator sa mga empleyado ukon mga indibidwal nga nakakaon sang arroz caldo nga ginpanghatag sa Bacolod City Government Center (BCGC) nga kun makabatyag sang malain sa tiyan gilayon nga magpadulong sa City Health Office.
Suno kay Atty Mark Mayo, City Administrator sang Bacolod City Goverment, alas-10:00 kahapon sang aga nagreklamo ang is aka staff sang Business Permit and Licensing Office (BPLO) nga may nakita ini nga foreign object sa arroz caldo.
Nahibaluan nga sang nagpatigayon sang Business One-Stop Shop (BOSS) ang BLPO, nagpanghatag sang arroz caldo si Councilor Wilson Gamboa Jr. para sa mga empleyado sa sulod sang BCGC.
Suno kay Atty Mayo, yara sa 300 ka mga indibidwal ang nakakaon sa ginpanagtag nga arroz caldo.
Suno diri, kun may ara sang mabatayagan nga malaon sa tiyan gilayon nga ipahibalo sa City Health Office.
Samtang, wala naman sang may nareport nga may medical emergency sa pila ka mga nakakaon nga mga indibidwal.
Ginpanginwala ni Councilor Wilson Gamboa Jr. nga halin mismo sa ila nga arroz caldo ang foreign object nga ginreklamo sang isa ka empleyado sang Bacolod City Government Center kahapon sang aga, Enero 16.
Suno kay Gamboa, ginsugo niya ang isa niya ka staff nga magpadulong sa Bacolod City Health Office agud nga mahibaluan kun ano to ang nakita nga yara sa arroz caldo kag wal pa ginpahayag kun ano ini ka klase sang foreign object.
Suno diri, ginpadala na niya ang foreign object para sa laboratory test kag ang resulta ang makuha sa Lunes (Enero 19).
Pahayag sini nga posible nga ang foreign object ang nakuha sang pag-transport sang arroz caldo.
Dugang pa, indi sa gihapon ini mag-untat nga magpanghatag sang arroz caldo bangud dako na ini nga bulig ‘pantawid gutom’ sa mga empleyado kag mga tawo nga nagaproseso sang permit sa sulod sang BCGC.
