Nagahulat pa sang desisyon sang pamilya ang Bacolod Police Station 1 kun magpasaka sang kaso batok sa suspect nga nagluthang sa Barangay 12, Bacolod City kahapon, Enero 16.
Sa interview sang Bombo Radyo kay Police Captain Efren Legada, hepe sang Bacolod Police Station 1, ang biktima ang ginkilala nga si Danica Labaja, samtang ang suspect ang ginpahayag nga si Mark Joseph Ilalim.
Ang duha ang ginapahayag nga nagarenta lamang sa lugar kag binulan pa lamang ang ila nga relasyon.
Suno diri, alas-5:30 kahapon sang aga samtang naga-away ang duha, may isa ka lalaki nga tuyo kuntani nga magtambag. Bangod sa kaakig sang suspect, gintiro sini ang lalaki, apang akidente sini nga naigo ang nobya sa natuo nga abaga.
Gilayon nga gindala ang biktima sa ospital kag natalana nga ipaidalom sa operasyon.
Sa karun, stable na ang kahimtangan sang biktima kag nakaatalana nga ipasaidalom sang operasyon.
Samtang ang suspect naman ang yara sa kustodiya sang Bacolod Police Station 1 para sa nagakaigo nga disposiyon.
