Natigayon nga marescue ang 60 anyos nga lalaki matapos mastranded sa tunga sang lawod sa sulod sang 27 oras.
Sa interview sang Bombo Radyo Bacolod kay Toboso Municipal Disaster Risk Reduction and Managment (DRRM) Officer 3 Engr. Hospicio Carbajosa, alas-4:00 sang kaagahon kahapon sang nagpalawod ang biktima nga si Joel Montecino, residente sang Sitio Bunatan Highway, Brgy Salamanca, Toboso.
Sa masami alas-12:00 sang udto ini ang nagapauli agud magpanyaga, apang kahapon nagdangat na sa alas-2:00 sang hapon ini ang wala pa makapauli.
Gani nagkabalaka na ang iya pamilya kag ini ang ila nga ginpangita apang napaslawan.
Suno kay Carbajosa, napadangat sa ila ang report alas-6:00 na sang gab-i, kag gilayon man nila nga ginnotify ang Coast Guard sa mga kaiping nga local government units.
Apang bangod mabaskog ang ulan kahapon, napilitan sila nga untaton ang search and rescue operation kagab-i.
Ginpadayun nila ang operasyon kaina sang aga upod sa Bantay Dagat, tubtob nga nakita nila si Montecino.
Suno diri, siya ang nagapanagat isa tubtob duha ka kilometros lamang gikan sa takas, apang naguba ang makina sang iya pump boat.
Wala man nagkapan ang sakayan, apang siya ang nakit-an kapin anom tubtob pito ka kilometros na gikan sa takas, matapos nga ini ang naghawid sa fish segrerating device, agud indi na magpalayo pa.
Suno kay Carbajosa, maayo man ang kahimtangan sang biktima, apang ini ang nagutman.
Gilayon naman ini nga ginpapauli sa iya pamilya.
