Ginpaathag ni Dr. Madeline Piccio-Sotomil, PhD, President of NOGCA (Association of Counselors in Negros Occidental), nga alarming na ang pagsaka sang kaso sang pag-utas sang kaugalingon nga kabuhi kag ini ang nagapanguna nga rason sang kamatayon ilabi na sa naga-edad 15 tubtob 29 anyos.
Suno sa iya, kulang gid ang guidance counselors sa elementarya kag high school, apisar amo ini ang formative years sang kabataan kun sa diin dapat matudluan sila sang social kag life skills.
Suno diri, madamo nga isyu pareho sang bullying, depresyon, stress, anxiety, kag academic pressure ang wala natagaan pagtamod bangud kadam-an sa ginatalana sa guidance office amo man ang mga maestra nga wala napaidalom sa espesyal nga training.
Ini ginadugangan pa sang epekto sang teknolohiya kag stigma nga ginakahuya ang pagkadto sa counselor ukon psychologist.
Ginalauman ni Sotomil nga mapatuman na ang Basic Education Mental Health and Well-Being Promotion Act (Republic Act No. 12080) agud masolbar na ang kakulangan sang guidance counselors sa mga eskwelahan.
Ginapanawagan man ni Sotomil ang madugay na nga gina-ayo sa gobyerno nga monetary support, training, kag opisina para sa mga guidance counselors.
Ginapanawagan ni Sotomil ang publiko kag gobyerno nga tagaan gid atensyon ang mental health, himuan sang interbensyon, kag tapna-on ang stigma sa mga naga-sufrer sa mental health issues.
