Ginbisitahan ni National Police Commission – Negros Island Region (NAPOLCOM-NIR) Director Atty Owen de Luna si Police Staff Sgt. Enrique Gonsaludo nga suspek sa pagpatay kay Kristine Joy Dignadice, sa custodial facility sang Criminal Investigation and Detection Group (CIDG) sang Negros Occidental Police Provincial Office (NOCCPO).
Suno kay de Luna, maayo ang kahimtangan ni Gonsalud kag palapangamuyo ini.
Suno diri, nakahibalo si Gonsaludo nga ang iya ginaatubang nga kaso amo ang murder matapos nga nagwa na ang resolution gikan sa Talisay City Prosecutor’s Office.
Apang nagapadayon man ang iya nga administrative case.
Sa karon, wala pa nag-abot ang commitment order kag hibaluon pa kun ano nga korte ang magauyat sang kaso agud ma set ang arraignment.
Madumduman nga sang Oktubre 29, 2025, nasapwan ang duguon nga salakyan ni Kristine Joy sa isa ka katubuhan sa Sitio So-ol, Brgy. Gargato, Hinigaran. Bangud sini, nagsungka si Gonsaludo kay PRO-NIR Director Police Brig General Arnold Thomas Ibay kag ginkumpirmar ang iya paghimo sang krimen. Gintudlo man ni Gonsaludo sa mga otoridad ang lugar kun diin niya gintago ang bangkay sang 43-anyos nga biktima nga tumandok sang Victorias City.
