Patay ang isa ka lalaki nga gina-alegar may diperensya sa paminsaron matapos ginluthang sang security guard sa Kabankalan New Public Market, sa Brgy. 1, Kabankalan City, Negros Occidental pasado alas-4:00 kahapon sang hapon, Enero 19.
Sa interview sang Bombo Radyo kay Police Captain Gary Alan Resuma, hepe sang Kabankalan City Police Station, ginkilala ang biktima nga si alyas “Alim”, 33-anyos, wala sang asawa, wala sang trabaho kag residente sang Sitio Balisong, Brgy. Orong, Kabankalan City, samtang ang suspek naman ang ginkilala nga si alyas “Joe”, 35-anyos, lalaki, kasado kag resident sang Prk. Camansi, Brgy. Inayawan, Cauayan.
Suno kay Resuma, gin-off sang biktima ang main power switch sang establisyemento, rason man agud tsekyaron sang security guard ang lugar.
Suno diri, sang yara na sa lugar ang suspect nakita sini ang biktima kag ginhambalan nga maghalin apang ini ang wala nagsunod kag nagbato pa sa iya, nga nagtuga sang komosyon.
Matapos sini, hinali nga ginkuha sang suspek ang iya armas-luthang kag gintiro sang makapila ka beses ang biktima.
Gilayon naman nga gindala si alyas “Alim” sa Lorenzo Zayco District Hospital para sa nagakaigo nga pagbulong apang gindeklarar nga wala na sang kabuhi.
Samtang, boluntaryo naman nga nagsungka ang suspect sa Kabankalan City Police Station kag gin-turnover ang iya armas-luthang para sa nagakaigo nga disposisyon.
Sa karun, nagpatigayon sang follow-up operations ang kapulisan agud ma-locate ang himata sang biktima.
