Masobra P700,000 ang balor sang illicit cigarettes ang natigayon nga makumpiskar sang Kabankalan City Police Station sa ginpatigayon nga operasyon sa Sitio Utod, Barangay Hilamonan, Kabankalan City, Negros Occidental kahapon, Mayo 4, 2026.
Sa interview sang Bombo Radyo Bacolod kay Police Lt Col Joem Malong, spokesperson sang Police Regional Office Negros Island Region, natigayon ang operasyon matapos nga makabaton sang tawag gikan sa mga concerned citizen angot sa pagdiskarga sang mga makaduluda nga mga karton nga ginapatihan nga nagaunod sang illegal cigarettes.
Suno kay Malong, naaresto sang nagresponde nga mga otoridad si alias “Bas” 57 anyos, male, driver/vendor, single,kag residente sang Santa Catalina, Zamboanga City samtang nagadiskarga sang mga karton nga nagaunod sang gina-alegar nga mga sigarilyo nga wala sang nagakaigo nga graphic health warning ukon paglapas sa Republic Act No. 10643 gikan sa red Isuzu Elf.
Nakuha sa possession kag control sang suspek ang 21 ka small boxes sang sigarilyo nga may label nga tourism cigarettes, walo ka dalagko nga boxes sang tourism cigarettes, 12 big boxes sang BOSQU cigarettes nga nagabalor sang P715,000, kag ang red Isuzu Elf dropside.
Ang suspect ang nagikan sa Zamboanga kag gina-alegar nga sa nasambit man nga lugar naghalin ang iligal nga sigarilyo.
Dugang pa ni Malong nga ang nakumpiskar ang katunga nalang kag ginamonitor pa kun sa diin gindala ang iban sini.
Suno diri, ginatransport ang illegal nga sigarilyo paagi sa Roro kag maga-coordinate naman ang PRO-NIR sa maritime authorities agud nga ma-intercept ang kaangay sini.
