Ginahulat na lamang ang sabat sang driver sang motorsiklo nga nagapatunga sa dalan kag wala naghatag sang ligwa sa malabay nga fire truck nga maresponde kun tani sa sunog sa Barangay Alijis, Bacolod City.
Sa interview kay Land Transportation Office – Negros Island Region Director Jeck Conlu, ginpadal-an na sang show cause order ang drayber kag ini naka-atubang na sa ila.
Suno diri, natukiban nga ang motorsiklo nakarehistro sa lain nga pangalan, wala narenew ang rehistro sang unit, samtang ang driver naman residente sang Brgy. Handumanan nga wala sang lisensya.
Posible nga dagdagan sang penalidad ang driver sa pagbayolar sa failure to give way to emergency vehicle, no valid license registration, kag reckless driving.
Suno kay Conlu, kun wala sang drivers license, mahimo nga dagdagan sang penalidad nga isa ka tuig nga suspension ang driver ukon marevoke ang iya drivers license.
