Gin-athag ni Negros Occidental Provincial Administrator Atty. Rayfrando Diaz ang rason sa pag-issue sang arrest warrant batok sa journalist nga si Erwin “Ambo” Delilan.
Sa interview sang Bombo Radyo kay Diaz, sang Disyembre pa ini nagfile sang kaso nga unjust vexation batok kay Delilan kag ginserbe sang Lunes ang arrest warrant alas- 11:00 sang gab-i.
Suno diri, ini nga tikang ang ginhimo niya bangod wala untat ang pagpangyaguta ni Delilan sa iya kag kay Governor Eugenio Jose ‘Bong’ Lacson sa social media.
Ginfile ang kaso sa ciudad sang Talisay apang ang Regional Trial Court sa Bacolod City ang nagbaton.
Samtang hatagan naman sang kahigayonan si Delilan nga magdepensa sa iya kaugalingon kag nahimo man sini nga magpyansa kahapon.
Suno kay Diaz, sadto isa siya sa nagbulig kay Delilan sa kabudlayan sini kun sa diin halos isa ka tuig ang pagtatap niya sa iya.
Dugang pa sini, bisan sa magagmay nga butang nagabulig gid ini kay Delilan kaangay na lamang sang nagpangayo ini sang VIP ticket para sa Miss Masskara.
Bangod sini, ginakwestyon ni Diaz nga ang pagpangyaguta pa ang ginbalos ni Delilan sa iya kag wala ini nakumporme nga kun diin ang kaayohan didto lang siya ginapalapitan apang matapos ang tanan gintraidor lamang siya sang tawo nga iya ginbuligan.
Samtang, ginlab-ot man sang Bombo Radyo Bacolod si Ambo Delilan apang gin-abiso sang legal counsel sini nga indi anay maghatag sang official statement.
