Ginluthang sang gina-alegar duha ka persona ang barker nga nagatulog sa kilid sang building sa Mabini Street, Brgy 40, Bacolod City, sa bahin sang Libertad Public Market nga malapit sa University of Negros Occidental – Recolletos.
Sa interview sang Bombo Radyo Bacolod kay Alyas Jose, nagapangarton kag nagatulog man sa area, nakabati na lamang ini sang lupok kapin alas-3:00 kaina sang kaagahon.
Suno diri, ginpahayag sang security guard sang isa ka convenience store kag sang eskwelahan nga duha ang suspect, lunsay nakabonnet kag sakay sa e-bike.
Pahayag ni Jose nga wala man ini sang may nabatian nga singgitanay, sa baylo duha ka lupok lamang ang iya nabatian, kag ang pagpangayo sang tabang sang biktima.
Ginalantaw sini ang posibilidad nga basi paghinisa-ay ang motibo sa krimen.
Apang suno diri, bangod sila ang magkalapit lamang sang ginatulugan nga area, wala paman ini sang nakita nga may nakaaway ang barker.
Sa inisyal nga impormasyon sang Bombo News Team, may igo sang bala sa bahin sang tiyan kag hita ang biktima.
Ini ang gindala naman sa ospital para sa nagakaigo nga pagbulong.
Samtang may mga narecover man nga basiyo sang wala pa matumod nga bala ang personnel sang Bacolod Police Station 6 nga nagresponder sa insidente.
