Nakibot ang mga otoridad sang natukiban nila nga ang isa ka lalaki nga nagapanglimos ang nagapanag-iya sang tatlo ka balay kag tatlo ka salakyan.
Ang lalaki ang ginkilala nga si Mangilal, 50-anyos, kag residente sang Indore, India.
Nahibaluan sang mga otoridad nga malayo sa kamatuoran ang sitwasyon sang 50-anyos nga manuglimos sang ila kuntani buligan kadungan sang ila nga ginapatigayon nga operasyon para sa ginaduso nga beggar-free city sa Indore, India.
Si Mangilal ang indi na kalakat bangud lupog ini kag nagapungko lang sa tapi nga may royda.
Suno kay Mangilal, indi niya intensyon ang manglimos kag nagapungko lang ini samtang nagaduko sa kilid sang dalan, apang makaluluoy gid ini kun tulukon dugang pa nga wala man siya sang mga tudlo bangud sa leprosy.
Matapos nga siya ginrescue, napaliguan, kag nahatagan sang malimpyo nga panapton, gin-usisa sang otoridad si Mangilal tuhoy sa iya sitwasyon kag natukiban nga wala ini nagakinahanglan sang bulig.
Nahibaluan nga nagaganar si Mangilal sang linibo nga rupees kada adlaw kag nagapautang sang kwarta nga may tubo sa mga tindera sa Sarafa Bazaar.
Magluwas sa iya balay nga ginapulian, nagapanag-iya pa gid ini sang balay nga may tatlo ka panalgan, kag isa pa gid ka balay nga gikan sa gobyerno.
Nagapanag-iya man ini sang duha ka Electric Tricycle, kag isa ka salakyan nga iya ginapagamit sa iya ginhire nga driver kag ginasweldohan niya ini sang kapin P7,000 ukon 12,000 rupees kada bulan.
Sa ginpatigayon nga imbestigasyon, natukiban nga nagapanglimos man ang mga himata ni Mangilal.
Suno sa otoridad, ang tanan ang ginplano gid sang maayo ni Mangilal kag ang iya nga stratehiya ang nagdala sa iya sa manggad.
