Ginsugudan na sang Bacolod City Department of Social Services and Development (DSSD) ang pag-implementar sang City Anti Mendicancy Ordinance sa ciudad sang Bacolod.
Sa interview sang Bombo Radyo Dr. Richelle Verdeprado Mangga, head sang Bacolod City Department Of Social Services & Development (DSSD), ang bag-o nga City Ordinace No. 1112 ang magahatag sang penalidad sa mga nagapanglimos kag sa nagahatag sang limos.
Santo sa nasambit nga ordinansa, ang nagapangayo sang limos ang sarang mamultahan sang P1,000 kag posible nga mapriso sa sulod sang isa ka bulan.
Samtang, kun ini ang ikaduha na nga beses nga madakpan nga nagapangayo sa gihapon sang limos, ini ang magapangatubang sang penalidad nga P1,000 pesos kag posible nga mapriso sa sulod sang anum ka bulan.
Suno kay Dr. Mangga, may ara man sang penalidad nga P500 ang madakpan nga magahatag sang limos.
Paathag sini nga ang ordinansa ang gina-implementar agud nga mapunggan ang padayon nga pagdamo sang mendicants sa ciudad bangud suno diri madamo na sila sang nabaton nga reklamo angot sa nagapangayo sang limos lakip na ang harassment.
Ginhingyo sang DSSD sa publiko ang kooperasyon agud mangin madinalag-on ang pagpatuman sang amo nga ordinansa.
