Nagapanawagan ang Land Transportation Franchising and Regulatory Board Region 6 sa nagpost sang video sang tuman na ka overloaded nga modernized jeepney sa Bacolod City kasubong man ang iban nga luyag nga magreklamo nga magtambong sa patigayunon nga hearing sa Pebrero 3.
Sa interview sang Bombo Radyo Bacolod kay Atty Salvador Altura, chief legal officer sang LTFRB Region 6, sila ang nag-issue man sang show cause order sa operator sang modernized jeepney matapos makita ang naglapta nga video sa social media.
Ang operator nga MBMJ and UY Transport Services Inc. nga may slogan nga “your safety is our priority,” ang ginahatagan sang 72 oras sa pagsabat sa show cause order angot sa violation sa overloading kag not granting of discount.
Suno sa tagreklamo, P20 ang ginticket sa tanan nga pasahero, bisan sa Estudyante kag Senior Citizen kag regardless sa distansya.
Natalana ang hearing sini sa Pebrero 3 alas-10:00 sang aga sa LTFRB Regional Office sa Iloilo.
Apang paathag ni Altura nga dapat magtambong ang mga nagareklamo bangod indi magamit sa complaint ang ila mga testimoniya kun ibase lamang sa social media posts kag interview sa radyo.
Suno diri, kinahanglan nga maghatag ang tagreklamo sang testimoniya under oath.
Sa pihak nga bahin, kinahanglan man nga mangin mahalong sang LTFRB sa pagdesisyon sa reklamo, bangod aminado ini nga tanan nga mga jeep ang nagakomiter sang overloading partiular na sa rush hour.
Suno kay Altura, sa layi, kun ang jeepney unit ang makakomiter sang kaangay nga sala nga makatatlo na nga beses, subject sa revocation ang prangkisa sang operator.
Gani ginakahangawa ni Altura nga kun ireklamo ang tanan nga mga nagabayolar sa overloading policy, madulaan sang jeep sa pila ka mga routa nga makatuga sang mas dako nga problema.
Bangod indi mapatuman ang principal penalty, lantawon pa nila kun sarang mapasakaan ang multa.
Sa mga may kaangay nga reklamo, sila ang sarang magreklamo paagi sa LTFRB website ukon sa 888 hotline.
