Dakop ang 21 anyos nga lalaki matapos mangholdup sa computer shop sa Purok Paglaum, Barangay Taculing, Bacolod City.
Ang suspetsado ang ginkilala nga si Ryan Ramos alyas Job, 21 anyos, wala sang trabaho kag residente sang nasambit nga lugar.
Sa interview sang Bombo Radyo kay PCapt Peter John Ramos, station commander sang Bacolod Police Station 6, sang Biyernes sang gab-i ginsulod ni Job ang computer shop kag nagpanaya sang armas luthang sa mga tawo kag ginkuha ang cellphone kag kwarta sang mga biktima.
Natigayon naman nga nadakpan si Job kahapon alas- 10:02 sang aga paagi sa hot pursuit operation apang wala pa madakpan ang isa sini ka kaupod.
Samtang, magluwas sa isa ka unit sang caliber revolver nga narekober, nakuhaan sang isa ka gramo sang suspected shabu si Job nga may standard drug price nga P6,800.
Pahayag ni Ramos, bangod nga wala sang trabaho ang suspek, nagsulod ini sa illegal nga buluhaton.
Dugang pa sini, gab-i nagpatigayon sang pagpangholdup ang mga suspek amo nga gindakop ini sang aga sa tion nga nagatulog ini.
