Dismayado si Department of Public Works and Highways (DPWH) Secretary Vince Dizon matapos makita ang mga proyekto nga wala pa matapos sa Bicol Region, lakip na ang mga proyekto nga gina-uyatan sang mga kontrobersyal nga kontratista.
Nakita ni Dizon ang duha ka daku nga poste sang Malabog Flyover, nga ginsuguodan patindog sang 2021.
Suno kay Dizon, makita gid nga ginpabay-an kag gin-abandonar ang amo nga Flyover.
Nahibaluan nga may P159 million nga budget ang amo nga proyekto, apang 12 percent lamang sang 700-meter flyover ang natapos.
Nadiskubrehan nga ang HI-TONE Construction and Development Corporation nga ginapanag-iyahan ni Christopher Co kag ang Alpha and Omega General Contractor and Development Corporation nga ginapanag-iyahan sang pamilya Discayas ang nagdumala sang proyekto.
Si Co ang utod sang anay kongresista kag subong fugitive nga si Zaldy Co.
Ginpahayag sang DPWH chief nga iga-rebid ang flyover project kag itugyan sa bag-o nga kontratista sini nga bulan sang Pebrero.
Ginkahangaw-an man ni Dizon ang Bicol Regional Medical Center sa Daraga, Albay bangud halin sang nagsugod ang konstruksyon sang 2023, apat pa lamang sa napulo ka panalgan nga pasilidad ang natapos.
