Ginbasura na sang Office of the Ombudsman ang kaso nga ginpasaka batok kay Department of Public Works and Highways (DPWH) Secretary Vince Dizon angot sa konstruksyon sang mga pasilidad sang 2019 Southeast Asian (SEA) Games bangud sa kakulangan sang ebidensya.
Suno kay Assistant Ombudsman Mico Clavano, yara sa joint resolution nga ginpagwa sadtong Disyembre 2021 ang pagbasura sang kaso matapos mapamatud-an nga kulang ang ebidensya batok kay Dizon.
Naggwa ang pahayag kasunod sang anunsyo ni National Bureau of Investigation (NBI) Director Melvin Matibag nga gina-imbestigaran sang ahensya ang ginaalegar bidding kag funding anomalies sa mga proyekto sang 2019 SEA Games, partikular sa New Clark City Sports Complex, base sa mga bag-o nga impormasyon nga nagtuhaw.
Apang, ginpahayag Palace Press Secretary Claire Castro nga sadto pa man, gin-imbestigahan na si Dizon kag ginbasura ang reklamo bangud sa kakulang sang ebidensya.
Madumduman nga si Dizon ang presidente kag chief executive officer (CEO) sang Bases Conversion and Development Authority (BCDA), nga nagdumala sa konstruksiyon sadto sang nasambit nga sports complex.
Samtang, ginpaathag naman sang Department of Justice (DOJ) nga ginakilala sini ang gahum kag operational independence sang NBI sa pagpatigayon sang nasambit nga imbestigasyon.
