Nagapanawagan ang alkalde sang Sagay City nga gilayon nga kay-uhon ang taytay nga naguba sa Barangay Puey kasunod sang mabaskog nga pag-ulan sang tinalikdan nga Sabado.
Sa interview kay Sagay City Mayor Leo Rafael Cueva, ang nasambit nga taytay ang dugay na nga ginapangayo sang mga pumuluyo para sa mas mahapos nga pagtabok-tabok.
Suno kay Cueva, tinalikdan nga tuig lamang natapos ang konstruksyon sang taytay.
Suno diri, P64 million ang pondo sang Department of Agriculture sa proyekto sa idalom sang Philippine Rural Development Project samtang ang kontratista naman amo ang ASJ SONS Corp.
Suno sa City Engineer, indi ang mismo nga taytay ang naguba kundi ang nagaangot sa taytay nga puno sang cement bag nga ila ginhimo pre-construction way sang gina-ubra pa lang ang taytay agud makalabay ang mga heavy equipment.
Sang nahuman na ang taytay, wala na ginkuha ang mga sako nga may balas kag gintambakan na lamang.
Sa tion nga nagataas ang tubig, amat-amat nga nagakatiphag ang sa idalom nga bahin sang taytay.
Sa karon, ginadumili pa sa gihapon ang paglabay sang mga four-wheel vehicle sa lugar.
Suno kay Cueva, nagpakig-angot na sila sa city engineers’ office para sa gilayon nga pareconstruct sang taytay, apang wala na sang ipagwa nga pondo ang ciudad bangud may-yara pa ini sa sulod sang warranty period.
