Nagalaom ang Punong Barangay sa Brgy Kalamtukan, Bayawan City, Negros Oriental nga mapadasig ang pagpalapad sa 4-lanes sa dalan sa ila nga lugar nga mahimo pa makapanubo sang kaso sang mga naga-awas sa pil-as.
Ini kasunod sang pagkahulog sa pil-as sang mini dump truck sang City Engineer’s Office nga nagkuha sang siyam ka kabuhi.
Sa interview sang Bombo Radyo Bacolod kay Punong Barangay Renante Cadayday, ang dalan sa Sitio Orang kun sa diin natabo ang insidente ang isa ka National Road.
Pahayag sini nga 4-lanes na ang dalan sa ibawbaw nga bahin sang lugar, apang sa area kun sa diin nag-overshoot ang mini dump truck, nagapabilin gihapon nga 2-lanes.
Ginalantaw sang Punong Barangay nga kun malapad-lapad ang dalan, mahimo nga nakamanuever pa ang driver kag wala nag-awas sa dalan.
Pahayag ni Cadayday nga luwas sa mini dump truck, madamo naman sang naaksidente sa lugar.
Masami sa mga biktima ang indi sunado ang dalan ukon bag-o lamang nakalabay sa lugar.
Pahayag sini nga may warning signages man sa ibabaw nga bahin sang dalan, apang natabo gihapon ang aksidente bangod nadulaan sang prino ang truck.
Panawagan sini sa mga motorista nga kun nakahibalo nga may labayan nga malawig nga dulhugon, dapat maseguro gid nga okay ang prino.
Dugang pa sini nga kun yara sa dulhugon, mas maayo nga ipanaog sa lower gear ukon indi dugay-dugay nga nagaprino, bangod kun masami nga nagaprino, ini ang nagakatais ukon nagaka-utod man sa pagdugay.
