Ginapahayag nga ilegal nga druga ang motibo sa pagtiro patay sa isa ka menor de edad nga lalaki sa National Highway sang Barangay Refugio, Calatrava, Negros Occidental sang Huwebes, Pebrero 5.
Ang biktima ang ginkilala nga si alyas John, 17-anyos, single, residente sang Brgy. 5, San Carlos City samtang ang suspect naman ang ginkilala nga si alyas “Wawa”, lalaki, 21 anyos kag resident sang Purok Sling, Barangay 1, San Carlos City.
Sa interview sang Bombo Radyo kay Police Captain Jesus Alba, hepe sang Calatrava Municipal Police Station, vehicular accident lamang ang ginreport sa ila apang sa ila pagresponde, natukiban nga may yara sang gunshot wound ang biktima sa natuo nga bahin sang iya ulo nga nagresulta sang iya kamatayon.
Suno kay Alba, ang suspek ang nagakadto na sa balay sang biktima antes pa ang insidente agud manukot sa iya utang angot sa illegal nga druga.
Dugang pa, paagi sa narekober nga cellphone sang biktima natukiban ang pag-istoryahanay sa duha nga magkita sa gwa sa Campo 7, Barangay 5, San Carlos City.
Suno diri, nakuha man sa CCTV footage sa ginpatigayon nga backtracking, pasado alas 8:00 sang gab-i sa amo nga petsa, si Japoy kag si Wawa ang updanay sakay sang isa ka motorsiklo nga padulong sa banwa kun sa diin nagluntad ang pagpangluthang.// Padayon pa ang hot-pursuit operation sang kapulisan sa pagdakop sang suspek.
