Amat-amat na nga ginabag-o ang Senior High School curriculum kag ginarepaso kag ginapasanyog pa ang reading, litteracy kag numeracy program sang Department of Education.
Sa interview sang Bombo Radyo Bacolod kay RJ Paglomutan, Deputy Spokesperson sang DepEd Division of Bacolod, nagsugod ang K-12 Basic Education Program sang 2015.
Kun sa diin indi pwede nga makakuha sang manubo sa 75 nga grado ang mga learners, bangod madamo sang kinahanglan nga isumiter nga reports ang manunudlo.
Samtang kun may tatlo naman nga 75 nga grado ang estudyante, ini ang kinahanglan nga magpabilin sa iya grade level.
Apang kun may-ara sang failure, ang manunudlo ang madamo sang kinahanglan icomply, kag ini ang maka-apekto man sa ila assessment kag sa benepisyo nga mabatun.
Kun may failure, indi lamang ang manunudlo ang apektado bangod ini ang magareflect man sa records sang School Principal kag bisan sang DepEd Division.
Ini ang nagatuga sang mass promotion sang mga estudyante nga nagpanubo sa reading kag comprehension levels sang mga estudyante, bangod bisan ang indi pa dapat makapasar ang ginapapasar na lamang.
Isa sa ginaduso ni Education Secretary Sonny Angara nga dulaon na ang grade transmutation.
Dugang pa ni Paglomutan nga problema man ang kakulang sang manunudlo bangod ang dapat 25 tubtob 30 lamang ka estudyante sa kada classrooms, ang nagadangat sa 50 tubtob 60 students.
Nagadugang pa sa load sang mga manunudlo ang pagpatuman sang Aral Program kun sa diin ang mga estudyante nga may failing grades ang kinahanglan magkuha sa remedial classes ukon ang National Learning Camp kun summer.
Panugyan ni Paglomutan nga imbes nga magtutok pa ang mga may advisories sa pagtudlo sa mga kabataan nga may learning difficulties, mas maayo nga sila ang tipunon na lamang kag ihatag ang pagtudlo sa mga new teachers.
Ini ang makabig man nila nga assessment antes mahatagan sang regular classes.
