Napauli na sa ila puluy-an ang bangkay sang siyam ka tuig nga bata nga si Desiree Bornales nga ginlampusan sang bato sa Hacienda Badiang, E lopez, Silay City, alas-2:30 kahapon sang hapon, Pebrero 10.
Gilayon naman nga nga nagkadto ang mga himata, kakilala, kag mga representatives halin sa Silay City Government, Department of Social Welfare and Development (DSWD) kag Overseas Workers Welfare Administration (OWWA) agud maghatag sang suporta kag pakig-unong sa pamilya Bornales.
Natalana nga ilubong ang biktima sa Domingo sa Silay City Public Cemetery.
Suno sa amay nga si Edmund Bornales, ginapaschedule pa sa karun ang oras sang misa.
Nagpasalig naman si OWWA Administrator Atty. Patricia Yvonne Caunan, nga padayunon ang paghatag sang suporta sa pamilya.
Nahibaluan nga ang iloy sang mga biktima ang isa ka overseas Filipino worker (OFW).
Nagpasalamat naman ang amay sang mga biktima nga si Edmund Bornales sa paghatag sang bulig kag padayon nga nagapanawagan sang hustisya sa natabo sang iya mga kabataan.
Ginalantaw nga wala lamang ginlampusan sang bato ang mga menor de edad, kundi ginbunggo pa ang ila ulo bangud sa nakita nga mga dugo sa pader sang ila kwarto.
Samtang, wala pa nakita ang iloy sa haya sang bata bangud ini ang ara pa sa ospital kag ginabantayan ang duha ka mga kabataan nga padayon nga ginabulong.
