Magalunsyar ang Bacolod City Government sang application nga makabulig sa kampanya may kaangtanan sa nagasaka nga kaso sang human immunodeficiency virus (HIV).
Sa interview sang Bombo Radyo Bacolod kay Jonathan Diaz, focal person sang HIV awareness campaign, ginpatigayon na ang soft launching sang GCare kahapon.
Paagi sa application, ang mga pasyente nga may HIV ang sarang na nga makabook sang appointment sa pag-avail sang medical assistance, financial assistance, kag iban pa nga support services sa ila convenience.
Sarang mismo maka-appointment ang mga HIV patients sa ila nga balay, agud madula na ang stigma nga kahadlok sang mga pasyente nga mag-appointment sa gwa sa posibilidad nga ini ang mahibaluan sang iban.
Nahibaluan nga may-ara sang mga persona nga mahigko nagid ang panulok sa mga positibo sa HIV.
Pahanumdom ni Diaz nga cureable ang balatian kun indi ang madetect kag mahimuan sang tikang sang temprano.
Apang kun ini ang pabay-an kag nagapabilin nga aktibo ang sex life, mahimo nga makalaton pa sa iban, kag maglala nga sarang mangin tunaan sang kamatayon.
Suno diri, ang mga positibo sa HIV ang automatic man nga maka-avail sang persons with disability (PWD) card, apang ang iban ang nahadlok nga magsugid sang ila balatian sa atubang sang barangay ukon sa city hall.
Paagi sa GCare, sila ang makapatigayon man sang personal appointment para sa pag-avail sang PWD ID.
Ang GCares ang ginbench mark gikan sa Thailand, kag una nga patigayunon sa Bacolod City, nga Top 20 nga may pinakamadamo nga HIV cases sa Pilipinas nga nagdangat na sa 1,712 sang 2025.
Ang HIV awareness campaign ang nagalibot man sa mga eskwelahan para magpatigayon sang seminars.
Plano man nila nga magkoordinar sa mga business process outsourcing companies, mga malls kag iban pa nga may madamo nga empleyado para sa mga HIV awareness seminars.
Nagalaom naman si Diaz nga magadamo pa ang HIV treatment hub bangod sa karun ang Corazon Locsin Montelibano Memorial Regional Hospital kag Bacolod City Health Office pa lamang ang may nagakaigo nga pasilidad para sa nasambit nga balatian.
