Tuman ang kasubo nga nabatyagan sang asawa sang isa ka katapo sang 11th Infantry Battalion sang Philippine Army nga napatay sa engkwentro batok sa gina-alegar miyembro sang New People’s Army sa boundary sang Brgy Sto. Ninio, Tanjay City kag Brgy Narra, Bayawan City, Negros Oriental kahapon sang aga.
Ang napatay ang ginkilala nga si Corporal Renold Gardose, 29 anyos, residente sang probinsya sang Capiz, samtang ang nasamaran ang isa naman ka Private First Class.
Sa interview sang Bombo Radyo sa asawa ni Gardose, sang Sabado sang gab-i nagtawag pa ang iya bana sa iya kag sa ila bata nga duha ka tuig nga babayi apang pagkasunod nga adlaw nakibot na lamang ini sang makita sa social media nga may yara sang engkwentro sa Negros Oriental kun sa diin may natabo sa iya bana.
Suno diri, kahapon nagbyahe siya ala- 1:00 sang hapon padulong sa Negros kaupod ang iya pamilya apang naka-abot ini sa puerto alas- 10:00 sang gab-i kag nagbyahe padulong sa Bayawan City kag naka-abot pasado alas- 3:00 sang kaina sang kaagahon.
Suno sa asawa, madugay na sini nga nabaton kun ano nga klase sang trabaho may yara ang iya bana kag masakit para sa iya nga gamay pa ang ila bata apang wala na ini sang amay.
Para sa iya, maayo nga klase sang bana si Gardose, mapinalanggaon nga amay kag maboot nga abyan kag siya magaselebrar pa kuntani sang iya kaadlawan sa Pebrero 28.
Sa karun gina-asikaso na lamang sini ang tanan nga kinahanglanon kag ibyahe sini ang bangkay sang iya bana sa banwa sang Tapaz, Capiz kun sa diin ini ihaya.
