Gintawag sang kampo ni former President Rodrigo Duterte nga wala sang kamatuoran ang listahan sang International Criminal Court (ICC) sang mga gina-alegar co-perpetrators sa kaso sang crime against humanity.
Suno kay Atty Nicholas Kaufman, lead defense counsel ni Duterte, nga halos isa ka tuig na nga nahibaluan sang kampo sang anay Presidente ang mga identity sang mga ginaalegar nga mga co-perpetrators.
Suno diri sa polisa sang korte, hugot nga ginapabilin ang confidentiality sang mga pangalan.
Bangud sini, ginpanginwala sang lead defense counsel sang anay presidente ang alegasyon nga posible mabutang sa katalagman ang integridad sang imbestigasyon sang fiscal kun ihatag ang interim release sang anay presidente.
Ginpanindugan ni Kaufman nga ila pamatud-an nga wala sang basehan ang mga alegasyon batuk sa ginhingadlan nga co-perpetrators sa pre-trial hearing sang ni Duterte sa masunod nga semana.
Sa karun, nagapati si Kaufman nga wala sa mga pangalan nga yara sa listahan ang may warrant of arrest.
