Nagalaom ang abogado kag anay konsehal sa Bacolod City nga indi kabigon sang mga pumuluyo nga political ang Crimes Against Humanity cases ni former President Rodrigo Duterte sa International Criminal Court.
Sa interview sang Bombo Radyo Bacolod kay former Bacolod City Councilor Atty Renecito Novero, ini ang isa ka legal proceedings para sa mga pamilya nga nadulaan sang kabuhi bangod sa extrajudicial killings sa anti-drugs campaign sang Duterte Administration.
Sa pihak sini, gindayaw man niya ang parehas nga prosecution kag defense bangod sa maayo kag preparado nga pagpresentar sang ila nga mga argumento sa kaso.
Suno kay Atty Nicholas Kaufman, legal counsel ni Duterte, makabig nga phenominal leader ang iya kliyente, apang bangod lain ang management style sini siya ang namis-interpret.
Ginkwestyon man sini ang Philippine media nga suno sa iya, nagapili lamang sang selected statement sa mga public speech sang anay Presidente.
Panindugan sang abogado nga political rhetorics lamang ang ginahaboy sa iya kliyente kag wala sang nagakaigo nga basihan.
Wala sang may ginpresentar nga physical ukon documentary evidence si Kaufman, sa baylo ginpang-counter lamang sini ang mga ebidensya nga nauna nga ginlatag sang prosecution team.
Suno diri, lantawon pa sang ICC Judges kun may substantial evidence sa kaso, kag sa sulod sang 60 ka adlaw, magapagwa sang desisyon kun ipasaka sa trial chamber ukon isuspend ang kaso.
Apang sa personal nga paglantaw ni Novero, may-ara sang nagakaigo nga ebidensya agud ipasaka sa trial proper ang kaso.
Nagapati ini nga mas maayo nga maglabay sa trial kun sa diin magahumladanay sang mga ebidensya ang parehas nga partido.
Apang aminado ini nga ginagamit sang iban sa pamulitika ang issue.
Suno diri, kun may malain nga matabo kay Duterte sa sulod sang detention cell, ilabi na sa edad sini, mahimo gamiton ini sang kampo Duterte nga paagi agud makaganar sang emotional judgment para sa ila mangin kandidato sa masunod nga Presidential Elections.
Panindugan sini, nga ang isyu ang dapat tulukon nga criminal case kag panawagan sang hustisya sang mga napatyan sangsa ikonsiderar nga political case.
