Ginalauman nga mapatukod ang primary health care facility sa sulod sang mga presohan diri sa Bacolod City.
Sa interview sang Bombo Radyo Bacolod kay Councilor Em Ang, chair sang Committee on Health Bacolod City Council, ang pagpatuman sang ordinansa nga magapatukod sang primary health care facility sa sulod sang presohan sa Bacolod City amo isa ka importante nga tikang agud matagaan sang nagakaigo nga health care services ang mga Person Deprived of Liberty (PDLs) kag didto na lamang sila pagadapatan sang bulong kag indi na kinahanglan pa nga maguwa sa pasilidad.
Dugang pa niya, indi na kinahanglan ang pag-transport sang mga PDL pakadto sa ospital kag ini ang makahatag man sang mas mataas nga seguridad.
Malikawan man ang posible nga contamination ukon paglapta sang sakit, ilabi na kun may mga kaso nga nagakinahanglan sang madali nga pag-atipan medikal.
Ginpabutyag man sang konsehal nga dapat kompleto ang kagamitan sang health facility agud masabat ang mga emerhensya kag masiguro ang madali nga pagresponde kun may urgency nga sitwasyon medikal sa sulod sang presohan.
