Ginkumpirmar sang Department of Education (DepEd) Division of Bacolod nga green kag orange ang colors nga gamiton sang delegates sang Bacolod City para sa Negros Island Regional Athletic Association Meet (NIRAAM) 2026.
Sa interview kay RJ Paglumotan, Deputy Spokesperson sang Department of Education (DepEd) Division of Bacolod, may ginpatigayon nga final coordination meeting sa tanan nga functioning committee para sa pinakauna nga NIRAAM.
Suno diri, naestruyahan na ang preparasyon para sa Regional Athletic Association Meet kun sa diin ang official color nga gamiton sang delegates amo ang green kag orange.
Ginpa-athag ni Paglumotan nga ang orange nga color nagapakita sang pakpak sang manok bangod ang ciudad kilala bilang major producer sang manok nga inugbulang samtang ang green naman ang color nga nagapakita sang produksyon sang tubo sa Negros.
Ini ang mangin permanente na nga color sang delegates sang Bacolod City para sa NIRAAM.
Samtang, suno kay Paglumotan ang pagpaggwa sang medal tally naka-schedule alas- 8:00 sang aga, alas- 11:00 sang udto kag alas- 4:00 sang hapon.// Ang opening sang NIRAAM patigayonon sa Marso 1 sa Panaad Park and Stadium, alas- 3:00 sang hapon.
Ang sunod nga mangin host sang NIRAAM 2027 amo ang probinsya sang Siquijor.
