Barado nga crater ang ginalantaw sang Philippine Institute of Volcanology and Seismology (PHIVOLCS) nga rasun sa paglupok sang Bulkan Kanlaon.
Sa interview sang Bombo Radyo Bacolod kay PHIVOLCS Director Teresito Bacolcol, antes ang paglupok, naghina ang sulfur dioxide emission sang Bulkan.
Suno diri, yara sa 170 tonnes sang sulfur dioxide lamang ang ila narecord sa nasambit nga adlaw, mas manubo sa 300 tonnes per day nga sulfur dioxide emission nakaligad nga inadlaw.
Ini ang patimaan nga clogged ukon may nagabara nga bato sa crater sang bulkan, gani nagsaka ang pressure sa sulod.
Sang indi na masarangan ang pressure, didto na natabo ang Moderately Explosive Eruption.
Suno kay Bacolcol, ang paglupok ang may kaupod nga pyroclastic density current kag nagbuga sang dark greyish ash plumes nga nagdangat sa 2,000 meters ang kataason.
Ini ang naglawig lamang sang duha ka minutos, kag gilayon nga nasundan sang ash emission nga naglawig naman sang 40 minutos.
Suno kay Bacolcol, ang paglupok ang halos kaangay sa nangin paglupok sang Oktubre nakaligad nga tuig, gani ini ang indi pa ang ginatawag nga “the Big One.”
Nagapabilin naman sa Alert Level 2 ang status sang Bulkan.
Madumduman nga 41 na Barangays gikan sa anom ka local government units sa Negros Occidental ang apektado sang slight ashfall kag sulfuric smell.
