Nakapauli na ang mga residente nga nag-evacuate kasunod sa paglupok sang bulkan Kanlaon sang Huwebes alas- 4:38 sang hapon.
Sa interview sang Bombo Radyo kay Negros Occidental Provincial Disaster Risk Reduction and Management Office Head Irene Bel Plotenia, nakapauli na ang mga evacuees sang Bago City kag La Carlota City bangod wala man nagapuyo sa sulod sang 4km permanent danger zone ang mga pamilya.
Suno diri, kalabanan sa nag-eksperyensya sang ashfall amo ang ciudad sang La Carlota kag Bago kag banwa sang Pontevedra, Hinigaran, San Enrique, Valladolid kag Binalbagan bangod ang ang huyop sang hangin padulong sa Southwest nga dereksyon.
Suno kay Plotenia, madamol ang abo nga ginbuga sang bulkan santo sa mga abo nga nakolekta kag naclear sa dalanon.
Pasalig sini nga nagapabilin nga preparado ang PDRRMO nga yara sa red alert status agud sa tion nga maglupok ang bulkan, madasig ang pagresponde.
Madumduman nga ginpaidalom sa red alert status ang PDRRMO humalin sang Disyembre 2024 sang nagluntad ang major explosive eruption kag nagpabilin ang status sini tubtob sa karun.
Mensahe sini, ang pagpreparar indi lamang responsibilidad sang gobyerno kundi iya sang tanan halin sa kada isa, kada pamilya kag kada komunidad.
