Gin-ako sang Eight-Division World Champion nga si Manny Pacquiao nga naglantaw ini sang title match nanday Ryan Garcia kag anay World Boxing Council (WBC) welterweight champion Mario Barrios.
Madumduman nga sang tinalikdan nga tuig, gin-challenge ni Pacquiao si Barrios sa pareho nga korona para sa iya nga pagbalik naggikan sa apat ka tuig nga hiatus.
Apang napaslawan si Pacquiao sa match nga ginhiwat sang nakaligad nga tuig sa Las Vegas nga nagresulta sa draw.
Sang tinalikdan nga Dominggo, natuman ni Garcia ang wala nahimo ni Pacquiao kag ginlutos si Barrios gani karon siya na ang bag-o nga nagakapyot sang WBC 147-pound nga titulo.
Sa edad nga 47, ginalauman pa ni Pacquiao nga makakuha sang isa pa ka titulo, kag si Garcia ang madugay na nga nagapangabay nga makontra si Pacquiao sa isa ka match.
Sa isa ka interview sa boxing superstar, ginpahayag ni Pacquiao nga bukas ini sa posibilidad nga hangkaton si Garcia sa isa ka title match.
Madumduman nga gin-anunsyar sang tinalikdan nga semana ang ipatigayon nga match sa tunga ni Pacquiao kag anay sparring partner kag ex-world champion nga si Ruslan Providnikov sa isa ka exhibition fight nga pagahiwaton sa Abril sa Las Vegas.
