Nag-issue sang subpoena ang National Bureau of Investigation (NBI) kanday beauty queen kag actress Michelle Dee, actress Rhian Ramos, kag beauty queen Samantha Panlilio.
Ini ginkumpirmar ni attorney Maggie Abraham-Garduque, ang legal counsel ni Michelle Dee.
Madumduman nga nag-ibwal ang isyu sa alegasyon nga ginkastigo sang tatlo ang former driver ni Rhian kag ila pa ini gindetain sang Enero 17 tubtob Enero 19, nga ginpanginwala naman sang tatlo.
Santo sa statement sang abogado, nabaton nila ang subpoena sang tinalikdan nga semana sa ila opisina.
Nagpasalig naman si Garduque nga magacomply ang iya kliyente sa subpoena nga gin-issue.
Dugang pa sini, naintindihan nila nga kabahin sang case build up kag investigation sang NBI ang pagpasa sang subpoena sa respondents agud nga mabatian man ang ila nga pagpa-athag.
Samtang, nabaton naman sang driver nga si alias “Totoy” ang subpoena nga gin-issue sa iya sa kaso nga qualified theft nga ginfile sang legal team ni Michelle Dee.
