Madamo sang mga balay ang gintupok sang kalayo sa sunog nga nagluntad sa Purok Katilingban 1, Brgy 39, Bacolod City.
Ang sunog ang nag-umpisa kapin alas-11:00 sang aga.
Sa interview sang Bombo Radyo Bacolod kay Alyas Dezie, manunudlo nga may patigayunon kuntani nga training sa mga atleta kag nakalabay sa area, madasig ang nangin paglatay sang kalayo ilabi na nga naga-inikit ikit ang mga balay kag kalabanan ang human sa light materials.
Suno diri, siya ang may estudyante nga nagapuyo sa nasambit nga area.
Nakaangkon naman sang kabudlayan ang mga bombero sa pagpenetrate sa area bangod sa makitid nga dalan.
Samtang pahayag naman ni Mitzy Canuday, Brgy Tanod sa Brgy 39, ginatudlo nga gikan sa duha ka panalgan nga boarding house ang kalayo.
Ginapahayag man nga electrical in nature ang rasun sang sunog.
Pahayag sang Brgy Tanod nga may natabo man nga sunog sa lugar sang 2013, nga tuga man sang short circuit.
Samtang nagapasalamat naman ang mga residente sa Prk Mars, Brgy Singcang Airport nga wala nagtabok sa ila ang kalayo, bangod creek lamang ang nagaserbe nila nga boudary.
Samtang ang mga balay nga yara sa creek sa bahin sang Prk Katilingban1 ang nalab-ot na sang kalayo.
