Ginklaro ni Philippine Institute of Volcanology and Seismology (PHIVOLCS) Director Teresito Bacolcol nga wala sang nagluntad nga lava flow sa Bulkan Kanlaon kagab-i.
adumduman nga liwat natabo ang Moderately Explosive Eruption alas-7:04 kagab-i, insakto isa ka semana gikan sa una nga paglupok sang Pebrero 19.
Sa interview sang Bombo Radyo Bacolod kay Bacolcol, may mga facebook posts nga nagapahayag sang kahangawa bangod sa nakita nga kaangay nga lava gikan sa bulkan.
Gin-athag sini nga ang nakita amo ang Incandescent Ballistic Particles ukon mga mainit nga bato nga nagabaga sa baba sang bulkan, kag indi lava.
Suno diri, bangod sa tuman ka init sang mga bato, ini ang nagresulta man sa grassfire sa palibot sang crater.
Pahayag ni Bacolcol nga kaangay sa nakaligad nga paglupok, ini ang Moderately Explosive Eruption man apang mas mataas ang ginbuga nga ash kag gas plumes nga nagdangat sa 2.5 km.
Mas malapad man ang mga lugar nga nalab-ot sang ashfall kag napanimahu-an ang sulfuric smell.
May 40 na ka mga inisyal nga evacuees sa banwa sang La Castellana kag 40 man ka evacuees sa La Carlota City.
Sun kay Bacolcol, kabahin sang Alert Level 2 status ang pagluntad sang mga slight to moderate eruptions, apang ang Phivolcs ang nagapreparar man sa posibilidad sang pagpasaka sa Alert Level 3.
Ginpasalig naman sini nga ang paglupok ang indi pa ang ginakahangaw-an nga “The Big One”, nga isa ka Major Eruption.
