Nagpatigayon na sang kick-off solidarity meeting ang tanan nga may bahin sa Negros Island Region Athletics Association Meet 2026 nga magabukas na bwas, Marso 1.
Sa interview sang Bombo Radyo Bacolod kay Department of Education Negros Island Region Director Dr. Ramir B Uytico, bwas ang ila opening ceremony sa Panaad Park and Stadium alas-4:00 sang hapon, samtang magatakop ang event sa Marso 7.
Ang solidarity meeting ang nagaserbe nga re-orientation kag briefing para sa technical officials, delegation heads, police kag traffic security kag iban pa nga may partisipasyon sa pahampang.
Suno kay Uytico, gusto nila nga safe ang mga kabataan gani sila ang magapahamtang man sang Learners Right Protection desk sa kada quarters kag playing venues.
Gin-estoryahan man nila ang mangin plastada sang screening kag accreditation.
Matapos ang solidarity meeting, nagpatigayon man ang mga ini sang press conference upod sa media.
Una naman nga gin-estorya ni Bacolod City Mayor Greg Gasataya ang mga transport groups tuhoy sa pagseguro nga wala sang mamentaha kag magpasaka sang plete ilabi na nga madamo sang mga pangayaw nga atleta.
Nahibaluan nga may-ara sang 28 ka sporting events para sa Secondary level, 45 sa Elementary level, apat sa Para Games, kag yara man ang demo sports nga pickle ball kag cheer leading.
Suno kay Uytico, may-ara sang kabug-usan nga 8,648 delegates gikan sa 12 ka delegations nga ginalakipan sang Negros Occidental, Negros Oriental, Siquijor, Bacolod City, Kabankalan City, Silay City, Bais City, Bayawan City, Canlaon City, Dumaguete City, Guihulngan City kag Tanjay City.
Ang may pinakamadamo nga delegasyon amo ang Negros Oriental nga may 989, ginasundan sang Bayawan City nga 925 kag Bacolod City nga 902.
May ginhimo naman nga website para sa NIRAA Meet 2026 kun sa diin makita ang dalagan sang medal tally, kalakip na ang mga detalye sang mga magadaog.
May-ara sang ideklarar nga overall champion, samtang may separado man nga medal standings para sa Elementary, Secondary kag Para Games..
May nagamonitor man sa in and outs sang mga atleta sa tagsa ka billeting area, kag makita man ang status sa website.
