Suspect sa pagpamuno-patay sa Brgy Bata, Bacolod City sang Martes, nagsungka na sa kapulisan

Nagsungka na sa kapulisan ang suspek sa pagbuno-patay sa isa ka lalaki sa Prk Samwill, Brgy Bata, Bacolod City sang tinalikdan nga Martes sang gab-i.

Ang suspek ang ginkilala nga si Alyas Alog nga residente man sang nasambit nga lugar.

Sa interview sang Bombo Radyo Bacolod kay PCapt. Rosalino Pugoy Jr., officer in charge sang Bacolod Police Station 3, nagsurender si Alog sa isa ka Brgy.Tanod.

Suno kay Pugoy, ginahulat pa ang death certificate sang biktima agud mapasakaan na sang kaso sang iya himata ang suspek.

Madumduman nga ginbuno ni Alog si Ian Carl sang naglabay ini sa bahin kun sa diin masami nga nagatambay si Alog kag nakaagom sang multiple stab wounds ang biktima.

Suno kay Pugoy, magapangatubang sang kaso nga homicide ang suspek.