May mga nagapatughong na sang gatong gamit ang containers kag drum antes ang ginalauman nga bigtime fuel price hike sa masunod nga Semana.
Ini kasunod sa nagapadayun nga gyera sa Middle East nga nagpauntat sa produksyon kag deliveries sang mga produktong petrolyo.
Sa interview sang Bombo Radyo Bacolod kay Grace, staff sang Caltex-Mandalagan, sila ang nagpasaka sang piso sa presyo sang gatong kahapon.
Ini luwas pa sa regular nga adjustment kada Martes.
Suno diri, ginalauman na nila ang dako nga pagsaka sa presyo sa Martes, apang wala pagid sila sang ideya kun pila gid ang mangin pagsaka.
Pahayag ni Grace, nga wala paman sang panic buying sa mga gatong.
Ini bangod ginalauman na ang paghingagaw sang mga motorista sa pagpatughong sang madamo, samtang wala pa nag-epekto ang dako nga pagsaka sa presyo.
Apang suno diri, may pila na nga mga nagadala sang containers kag drums sa pagbakal sang Diesel.
Sa karun, ang ila nga Diesel ang nagabalor sang P63.40 kada litro; P62.75 sa Silver samtang P63.75 naman sa Platinum.
Pahayag ni Grace nga bastante paman ang ila nga fuels supply.
Suno diri, nakaligad isa ka bes sa kada semana lamang ang delivery sang fuel products, apang sa karun ini ang nangin duha ka beses kada semana na.
Dugang pa sini nga sa masami, kun magnubo na ang ila fuel supply gilayon man sila nga ginapadal-an sang dugang.
