Antes paman ang implementasyon sang 4-days work week sa mga government offices, ang Negros Occidental Provincial Government ang may ginapatuman na nga cost cutting measures nga nakasave sang million pesos kada tuig.
Sa interview sang Bombo Radyo Bacolod kay Negros Occidental Provincial Administrator Atty Rayfrando Diaz, antes paman ang ginapaabot nga krisis, sang Setyembre palang tinalikdan nga tuig, naka-umpisa na sila sa solarization sang Negros Occidental Provincial Capitol, Negros Residences, kag Food Terminal Market.
Pahayag sini nga ang proyekto ang gin-umpisahan gid sa pagrehabilitate sang mga electrical wirings sa kapitolyo nga naga-edad na sang masobra 20 anyos.
Suno kay Diaz, may nagaluntad kun kis-a nga short circuit bangod sa daan nga mga linya, kag iban diri ang may mga cuts kag splices na.
Sa karun, ini ang na-islan na kag may mga ginhamtang naman nga circuit breakers, tubtob nga na-implementar ang solarization.
Sadto P1.5 million ang bulanan nga ginabayaran sang Provincial Government sa electric bill, apang bangod sa solarization, ini ang nagpanaog sa P700,000 kada bulan.
Pahayag ni Diaz nga ang electric bill nga ginbayaran sang probinsya sang 2024 ang nagdangat sa P150 million para sa bilog nga tuig, apang sang 2025 ini ang nagpanaog na sa P135 million.
Bangod man sa dako nga pagnubo, sila ang gincall out pa sang Commission on Audit (COA), nga natingala kun ngaa hinali nga nagnubo ang expenses sang provincial government.
Luwas diri, alas-4:00 sang hapon pa lamang, ginapapatay na ang mga aircon antes ang pagsarado sang tagsa ka opisina alas-5:00 sang hapon.
Subong nga 2026, target nila nga masolarize naman ang iban pa nga pasilidad kaangay sang provincial kag district hospitals.
