Wala na sang iban pa nga mahimo ang mga tricycle drivers kundi agwantahon na lamang ang kapigaduhon kasunod sa pagsaka sang presyo sang produktong petrolyo.
Sa interview sang Bombo Radyo kay Jesus Capanas, isa ka dekada na ini nga nagabyahe sa ruta nga Banago padulong sa LCC – Bacolod kag makaginansya lamang ini sang P300 tubtob P500 kada adlaw.
Suno diri, kun madayon nga dako ang isaka sang presyo sang produktong petrolyo, ginalantaw sini nga inugbakal na lamang sang bugas kag sud-an ang mabilin sa iya kwarta gikan sa pagbyahe.
Dugang pa sini, tatlo ang iya kabataan nga lunsay tanan naga-eskwela kag ang asawa naman sini may yara sang tyangge.
Pahayag ni Capanas, indi man siya kasukot sang mahal sa iya mga pasahero bangod palarehas lamang sila nga pigado.
Panawagan sini nga kun tani indi lang pagpatam-an ang saka sa presyo sang produktong petrolyo bangod mabudlay man para sa ila ang magpangita sang palangabuhian; Ginpahayag sang presidente sang Federation of Irrigators Association Central Negros – Bago River Irrigation System nga indi malayo nga magsaka ang presyo sang bugas.
Sa interview sang Bombo Radyo kay Pedro Limpangog, kun magsaka ang presyo sang produktong petrolyo, posible man nga magsaka ang presyo sang fertilizer, pesticides kag iban pa nga ginagamit sa pagpanguma.
Suno diri, mas dako pa gid ang gastohon sang mga mangunguma sa paggamit sang ila machineries kag pagpatubig sa ila humayan.
Suno kay Limpangog, kun magsaka pa cost of production masaka man ang presyo sang bugas.
Aminado ini nga nagakabalaka siya para sa mga konsumedor kun magmahal ang presyo sang bugas nga adlaw-adlaw nga kinahanglanon.
Nabalaka man ini sa mga mangunguma nga wala nakapreparar sa ini nga hitabo.
Pahayag sini yara na sa karun sa P24 ang kilo sang humay kag ginapangabay sang mga manugunguma nga indi na magnubo ang presyo kag magbalik sa kapin P12 nga tuman nga kapierdehan sang mga rice farmers. Samtang, ginalauman ang pagsaka sang presyo sang karne sang baboy kasunod sa pagsaka sang presyo sang produktong petrolyo.
Sa interview sang Bombo Radyo kay Alliance of Hog Raisers Association of Negros Occidental (AHRANO) President Ric Lauron, bangod sa pagsaka sang presyo sang produktong petrolyo, ginalauman na sini nga sunod-sunod na ang pagsaka sang presyo sang balaklon.
Suno diri, posible nga magsaka ang presyo sang feeds, vitamins kag iban pa nga inputs sa hog raising.
Suno kay Lauron, nakabawi na kun tani sila sa halit nga ginbilin sang African swine fever kag hog cholera apang may bag-o naman sila nga kabudlayan nga paga-atubangon.
Sa karun ang presyo sang liveweight yara sa P175 tubtob P180 apang ini mahimo magsaka bangod sa ginapatong nga gasto, tubtob nga maglab-ot sa merkado kag ang mga konsumedor ang tuman nga maapektohan.
Apang, sila sa AHRANO, nagahatag man sang abiso sa ila mga miyembro nga maregulate ang presyo agud indi matam-an ang mga consumers.
Samtang, dugang pa ni Lauron, magluwas sa saka sa presyo sang produktong petrolyo, isa man sa ila kabudlayan amo ang aktibidad sang bulkan Kanlaon nga kun magbuga ini sang abo, ginamasakit ang mga kasapatan kag ginagastohan sang dako para mapabulong.
