Para sa Chairman sang transport group nga MANIBELA indi normal ang gulpyada nga pagsaka sang presyo sang produktong petrolyo.
Sa interview sang Bombo Radyo Bacolod kay Mar Valbuena, sadto amat-amat lang ang increase kag ini ang una nga kahigayunan nga tuman ka dasig ang pagpatuman sang dako nga adjustment sa presyo.
Suno diri, sa karun mansig diskarte na lang ang mga drivers kag operators agud makatipid sa gatong.
Iban sa mga drivers ang nagabyahe na lamang kun peak hours kag wala na nagalibot pa agud mangita sang pasahero.
Dugang pa sini, kun sang tinalikdan mahimo pa sang mga drivers nga makapauli bisan P400 ang ginansya nila sa biyahe, sa karun gamay na lamang ang ila mapauli bangod dako ang ila magasto sa pagpatughong.
Bangod sa epekto sang pagsaka sang presyo, tuman ang kabudlayan sang mga drivers kag operators, amo nga nagapanawagan ini sa gobyerno nga bantayan ang mga oil companies nga nagapang-abuso sa pagpasaka sang presyo sang produktong petrolyo, temprano nga paghatag sang fuel subsidy, kag pagbuhin sa excise tax kag value added tax.
Pahayag ni Valbuena, kaangay nga nahadlok ang gobyerno nga madulaan sila sang kwarta apang wala sila sang kabalaka kun madulaan sang kwarta ang pumuluyo.
